مصر کی سیکولر حزبِ اختلاف نیشنل سالویشن فرنٹ نے اسلامی آئین کی منظوری کے لئے ہونے والے ریفرنڈم میں شمولیت کا فیصلہ کرتے ہوئے اپنے حامیوں
سے اپیل کی ہے کہ وہ ریفرنڈم میں آئین کی مخالفت میں
ووٹ دیں۔
حزبِ اختلاف کا کہنا ہے کہ صدر مرسی اور ان کے حامیوں کی حمایت والا آئین کا نیا مسودہ کچھ زیادہ ہی اسلامی ہے۔
آئین کے مجوزہ مسودے کی منظوری کے خلاف پہلے حزب اختلاف نے ریفرنڈم کے بائیکاٹ کا اعلان کر کے مظاہروں کا سلسلہ شروع کردیا تھا۔ لیکن ریفرنڈم کی تاریخ نزدیک آنے پر وہ اس میں ازخود ہی شامل ہو گئے ہیں۔
حزبِ اختلاف کے اہم سیاسی رہنما اور عرب لیگ کے
سابق سربراہ امر موسٰی نے برطانوی خبر رساں ادارے رائٹرز سے بات کرتے ہوئے کہا کہ ہم اپنے ووٹ میں نا کہیں گے۔ جبکہ ناکام صدارتی امیدوار اور حزب اختلاف کے لیڈر حمدین صباحی نے کہا کہ مصری عوام کے پاس آئینی منصوبے کو رائے شماری کے ذریعے
ناکام بنانے کا موقع موجود ہے۔
ریفرنڈم کے لئے دوسرے ممالک میں واقع مصر کے سفارتخانوں میں پہلے ہی ووٹنگ شروع ہو چکی ہے۔ لیکن مصری عوام کی اکثریت 15 اور 22 دسمبر کو
آئین پر ہونے والے ریفرینڈم میں اپنا حق رائے دہی استعمال کریں گے۔
